Urriak 28 larunbateko proiektuak
Larunbatean hasiko dira partidak!
Larunbat honetan, urriaren 21a, eskola kirolan parte-hartzen duten ikasleek aurtengo lehen partidak jokatuko dituzte. Jarraian talde bakoitzaren ordutegia ikus dezakezue. Animo eta gozatu!
DBH 4ko ikasleak Elkarbizitzetan dabiltza Getarian
Aste honetan DBH 4.mailako ikasleak Elkarbizitzetan murgildu dira. Getarian kokatutako egonaldi hauetan ariketa eta taldeko dinamika ezberdinen bidez, ikasleen garapen integrala sustatzea bilatzen da. Elkarbizitzak ekimena Pastoral proiektuaren baitan garatzen da.
Ekintza honen helburu nagusia gazteek beren burua hobeto ezagutzea da, gertatzen zaiena irakurtzen eta antzematen ikastea, horrela, beren bizitzako gertaera eta erronka ezberdinen garrantzia neurtzen ikas dezaten era berean erronka horiek gainditzeko gaitasunak bereganatuz. Orotariko erronkak planteatzen dira Elkarbizitzetan, familiakoak, lagun artekoak edota akademikoak.
Era berean, ikaskideen arteko harremanak sendotzeko aukera paregabea bilakatzen da egonaldi hau, ikasleak beraien artean irekitzen direlako, barnekotasuna eta sentimendu zein emozioen kudeaketa landuaz.
Auto-ezagutzaren lanketa honetan Jainkoaren presentzia garrantzitsua izaten da. Izan ere, Jesus beraien barnean eta bere lagunengan ere badagoela ulertzen dute gazteek.
Atzo A gelaren txanda izan zen, gaur D gelari egokitu zaio Getariara gerturatzea eta ostegun eta astelehenean B eta C gelaren txanda izango da.
DBH 1. mailako ikasleak Donostia Sustapeneko proiektu batean murgilduta
Nola dinamizatu daiteke Urumea Ibaia? Hau izan da Donostia Sustapeneko Innovation League proiektuak gure DBH 1-eko ikasleei luzatu dien erronka, ibaia zeharkatzen dituen lekuen topagunea bilakatzeko helburuarekin. Gure ikasleak talde-lanean ari dira, beren espiritu berritzailea eta sortzailea piztuaz ideia onena aurkitzeko!
Innovation League proiektua hiru fasetan antolatzen da. AURRETIKO fasea ikastetxean gauzatu zen eta, bertan, ikasleei ekimen honek bultzatzen dituen erronka eta helburuak azaldu zitzaizkien. Oinarrizko xedea: ekintzara pasatuz ikasleen sormena eta jarrera berritzailea lantzen dituen proiektu bat gauzatzea.
Bigarren fasean, SAILKAPENA deiturikoa, proposamenak landu eta aurkeztuko dituzte ikasleek. Fase honetan, taldearen izena eta irudia lantzeaz gain, proposatutako erronkari erantzuten dion sormen ideia landuko dute ikasleek. DBH 1-eko B eta C ikasgeletako ikasleak fase honetan aritu ziren astelehenean, hilak 2. Datorren astelehenean, hilaren 9an, A eta D-ko ikasleen txanda izango da.
Behin SAILKAPEN fasea amaitutakoan, Donostia Sustapenak ikastetxe bakoitzeko ideia onena aukeratuko du talde horiek beren proiektua Udaletxeko Areto Nagusian aurkeztu dezaten hile honen amaieran, 24 eta 25ean zehatzagoak izateko. Oraingoz, eta irabaztearen helburua alde batera utzita, gure erronka nagusia ikasleek modu ezberdin batean ikastea baimentzen dien esperientzia berri bat bizitzea da, ikasketa esanguratsuagoak eta errealitateari konektatuagoak dauden ikasketak jasotzea.
Eta zergatik ez, Donostia Sustapeneko taldearen aukeraketa lana apur bat zailduko dugu, gure 12 urteko ikasleen ideia guztiak irudimen handikoak eta bikainak izango baitira!
Ametsen asteburua Arrupe Donostian
Pasa den asteburuan Guetadar hausnarketen eta ospakizunen topalekua bilakatu zen Arrupe Donostia taldearentzat. Begiraleak, pastoralistak, etorkizunean komunitateko kide izango direnak eta gaur egun Arrupe Sendoan dauden Batxilergoko bigarren mailako ikasleak, komunitatea osatu eta 2017-2018 ikasturteari ilusioz begiratzeko asmoz elkartu ziren.
Ostiraletik igandera, jardunaldia oso sendoa izan zen: taldeko egoeraren inguruko hausnarketa dinamikak, aurtengo indarguneen eskertzeak, Ignaziotar komunitateek dituzten marko berrien inguruko analisiak, esperientzia berriak bizitzetik datozen kideen testigantzak entzutea… Eskerrik asko Laura eta Miren.
Guzti hori Arrupek bere 4 etapetan dituen helburuak zehazteko eta urtean zehar ikasleekin burutuko diren ekintza ezberdinak doitzeko helburuarekin:
- Arrupe Haziak: Lehen Hezkuntza 4 eta 5.mailako ikasleak
- Arrupe Sustraiak: Lehen Hezkuntza 6.mailako ikasleak eta DBH 1 eta 2.mailakoak
- Arrupe Enborra: DBH 3 eta 4.mailako ikasleak
- Arrupe Sendoa: Batxilergoko 1 eta 2.mailako ikasleak.
Urtean zehar ikasleekin biziko diren esperientziak gogora ekarriaz, hausnarketa eta ilusio momentu batean bilakatzen da urtero Arrupe Donostiako topaketa hau. Horregatik, ez da kasualitatea topaketa honek duen izenburua: Ametsen asteburua.
3 eguneko jardunaldia Jesusen Lagundiko hezkuntza sarea indartzeko
Uztailaren 12an Amaia Arzamendik, Jesuitak Donostiako zuzendariak, ikastetxeak eraldatzeko bidean lidergoak duen garrantziaz hitz egingo du ikastetxean bizitako esperientzian oinarrituta.kastetxe Jesuiten berrikuntza gai nagusitako bat izango da Educsi-ren 33. Jardunaldietan.
Uztailaren 11, 12 eta 13an Educsiren 33. Jardunaldiak ospatuko dira Bilboko Deustuko Unibertsitatean. Elkargune honetan Espainia eta Portugaleko Jesusen Lagundiko 73 unibertsitate aurreko eta Lanbide Heziketako hezkuntza erakundek hartuko dute parte. Topaketak 3 helburu nagusi izango ditu.
• Ikastetxeen arteko sarea sustatzea.
• Lan egiteko eremuei eta ezagutza partekatzeko espazioei bidea ematea.
• Berrikuntza eta misioaren inguruan hausnartzea.
Jardunaldiari hasiera emateko Antonio España, sj, Aita probintzialak agurra egingo du. Lagundiaren hezkuntza komunitatera zuzentzen den lehenengo aldia izango da uztailaren 8an Aita Probintzial gisa karguaz jabetu ondoren.
Magdalenok, Zaragozako El Salvador Ikastetxeko zuzendariak, izango du Educsi Jardunaldietan landuko den lehenengo gaia aurkezteko ardura, astearte goizean, uztailaren 11an. Magdalenok ikastetxe jesuitek duten hezkuntza misioaren testuinguruan berrikuntzak izan behar duen lekua kokatzeko marko proposamena luzatuko du. Egun horretan, arratsaldez, berrikuntza honen baitan irakasleen rola aldatzeko gakoak azalduko dituzte Huelvako SAFA ikastetxeko zuzendaria den Eduardo Vizcaínok eta Colegio Claver de Raimat-eko DBH-ko 2. Zikloko zuzendariak, Minerva Pocelek.
Bigarren egunean, uztailaren 12an hain zuzen ere, saioa Amaia Arzamendik, Jesuitak Donostiako zuzendariak, eta Iván Mirónek, Vigoko Apóstol Ikastetxeko zuzendariak eskainiko dute. Tarte honetan Jesusen Lagundiko Ikastetxeak eraldatzeko lidergoaren inguruan arituko dira. Arratsaldean kultur-ekintzak egiteko eta hiria bisitatzeko denbora izango dute jardunaldira bertaratu direnek, besteak beste, Guggenheim edota Arte Ederretako museoak, Getxoko Zubi Esekia, Bilboko parte zaharra edota paseoa ontzian Bilboko itsasadarrean barrena.
3. egunean, uztailaren 13an, goizean zehar berrikuntza prozesuen kohesioaren inguruan hitz egingo da. Andrés García Indak, Zaragozako El Salvador ikastetxeko zuzendari ohiak dinamizatuko duen espazio honetan ondorengo pertsonek parte hartuko dute: Bilboko Colegio Ntra Señora de Begoñako Lehen Hezkuntzako zuzendaria, Maialen Herran; Madrileko Padre Piquer Trebakuntza Zentruko berrikuntza, hezkuntza eta orientazio zuzendaria, Gregorio Casado; Las Palmas-eko DBHko zuzendaria, Mª Isabel Doreste; eta, Oviedoko San Ignacio Ikastetxeko zuzendaria, Luis Ordóñez.
Elkarrizketa honen ondoren, jardunaldira bertaratu direnek Educsiko zentroetan martxan jarri diren hezkuntza berrikuntzen inguruan esperientziak partekatzeko aukera izango dute, 9 gune pedagogikoetan. Jardunaldien azkeneko hitzaldia Javier Gil Ojedak, Trilema Fundazioko Trebakuntza eta Berrikuntza zuzendariak eskainiko du, ostegun arratsaldean.
33. Jardunaldiak DeustUko Unibertsitateko klaustroan eskainiko den itxiera-afariarekin amaituko dira. Educsik antolatzen duen topaketa honek Deustuko Unibertsitatearen, Universidad Pontificia de Comillas-en, SMren eta Loyola Komunikazio taldearen laguntza jasotzen du.